LAOAG CITY – Nagsagaba ti nakana a sugat ti nakamotorsiklo kalpasan iti napasamak a desgrasia iti Barangay 8 San Rufino iti ili ti San Nicolas.
Segun ken ni P/Capt. Randy Damo, Hepe ti San Nicolas Municipal Police Station, ti nangiturong ti motorsiklo ket agtawen ti 24, awanan asawa ken residente ti Barangay 9 iti ili ti San Nicolas idinto ti pedestrian ket maysa a senior citizen nga agtawen ti 64 ken residente ti Barangay 8 iti nasao met laeng nga ili.
Inbatadna a basar iti inwayatda nga inisyal nga imbestigasion, kabayatan a dumaldalyasat ti nakamotorsiklo nga agturong nga agpa-amianan ket kellaat a bimmallasiw iti kalsada ti senior citizen.
Gapu iti daytoy, naipurwak ti nakamotorsiklo ken naitupa iti ulona iti kalsada idinto a nagsagaba ti sugat iti saka ti senior citizen.
Inlawlawagna a nakasuot ti helmet ti nangiturong ti motorsiklo idi napasamak ti insidente.
Innayonna a manarimaan pay laeng ti panagkalapda ti naan-anay a detalye iti desgrasia gapu ta awan ti dimmatag a mabalin a nakakita iti napasamak.
Iti agdama, nagtalinaed pay laeng dagiti dua iti Mariano Marcos Memorial Hospital and Medical Center iti siudad ti Batac para iti naan-anay a pannakataming dagitoy.
