LAOAG CITY – Nagsarili ti nakamotorsiklo iti Brgy. Sta Cruz Sur iti ili ti Badoc.
Nabigbig ti driver ti Yamaha Mio nga agmaris ti pink ken nangisit a ni Franklyn Francisco y Anteola, agtawen iti 25, awanan asawa, service crew ti maysa a convenience store ken residente ti Brgy. Darat iti ili ti Pinili.
Basar iti imbestigasion, kabayatan a dumaldalyasat ti nakamotorsiklo nga agturong nga agpa-daya ket kellaat a napukawan ti kontrol ti manibela a nangitunda ti pannakaidungparna iti gate ti maysa a pagtaengan.
Gapu iti daytoy, nagsagaba ti sugat iti nagduduma a paset ti bagi ti biktima a dagus met a naitaray iti Sto. Cristo Hospital idiay Sinait, Ilocos Sur babaen iti panagresponde dagiti kameng ti 2nd INPMFC Badoc Border.
Kabayatanna, naammoan a naawanan ti puot ti driver ti motorsiklo idi napasamak ti nasao a desgrasia.
Iti agdama, agtultuloy pay laeng ti maiwaywayat nga imbestigasion dagiti otoridad maipapan iti insidente.
