LAOAG CITY – Naidungpar iti poste dagiti dua nga indibidual a nakamotorsiklo iti Brgy. Guerrero iti ili ti Dingras.
Segun ken ni P/Maj. Norman Pentang, Hepe ti Philippine National Police iti ili ti Dingras, kabayatan a dumaldalyasat dagiti nakalugan ti motorsiklo nga agturong nga agpa-daya iti kurbaan a paset ti kalsada ket posible a kellaat a napukawan ti kontrol ti manibela ti driver.
Gapu iti daytoy, inbatadna a nagderderetso dagitoy agingga a naidungparda iti poste.
Inlawlawagna a basar iti inwayatda nga imbestigasion, rumrummuar a napataray dagiti nakamotorsiklo ken awan ti suotda a protective helmet ken high visibility vest idi napasamak ti desgrasia.
Kunana a nagsagaba ti sugat iti nagduduma a paset ti bagi ti nangiturong iti motorsiklo pakairamanan ti kinalubbonna a dagus met a naitaray dagitoy iti Rural Health Unit para iti naan-anay a pannakatamingda.
Innayonnna a saan met a nabartek dagiti biktima idi napasamak ti aksidente.
Mainaig iti daytoy, nagkedked ti Hepe iti Dingras Municipal Police Station a mangibuksilan ti pakabigbigan dagiti maseknan a biktima.
Kabayatanna, bayat a maisursurat daytoy a damag ket nagtalinaed pay laeng iti ospital dagiti nakamotorsiklo.
