LAOAG CITY – Naipit ti saka ti driver ti motorsiklo iti bumper ti maysa a 10 wheeler truck a nagkarga ti 16 a tonelada nga irik iti Brgy. 2, San Roque iti ili ti Paoay.
Segun ken ni Mrs. Lydia Taasin, ti passenger truck, bayat a dumaldalyasatda nga agpa-abagatan manipod iti ili ti Bacarra a mapan idiay Ilocos Sur ket ditoy a nakigtotda laengen gapu ta adda ti nakamotorsiklo ti kellaat a dimmungpar kadakuada.
Inbatadna a nainayad ti panagdalyasatda gapu iti kinadagsen ti karga iti luganda ngem napaspas ti taray ti nakamotorsiklo a nangitunda ti panagdinnungparda.
Kunana a rumrummuar a maipagarup a nabartek ti nangiturong ti motorsiklo ken saan daytoy a nakasuot ti helmet idi napasamak ti insidente.
Innayonna nga adda met ti ambulansia ken pulis a nangitaray iti maseknan a driver ti motorsiklo iti kaasitgan nga ospital para iti naan-anay a pannakatamingna.
Kabayatanna, bayat a maisursurat daytoy a damag ket ikarkarigatan pay laeng ti News Team ti Bombo Radyo Laoag nga alaen ti naan-anay nga imbestigasion ti nasao a desgrasia.
