LAOAG CITY – Natay ti nangiturong ti motorsiklo kalpasan a naatalan iti maysa a dump truck iti Brgy. 29 Pasngal iti ili ti Bacarra.
Nabigbig ti biktima a nangiturong ti motorsiklo a Mio I 125 nga agmaris ti puraw a ni Honeylyn Gaspar y Sevilleja, agtawen ti 32, awanan asawa ken residente ti Brgy. Ulayos, Catucdan, Cabugao, Ilocos Sur.
Nabigbig met ti nangiturong ti dump truck nga agmaris ti puraw a ni Erwin De la Cruz y Mata, agtawen ti 39, naasawaan ken residente ti Brgy. Manayon iti ili ti Bangui.
Segun ken ni P/Lt. Wilson Sahagun, Deputy Chief of Police ti Bacarra Municipal Police Station, kabayatan a dumaldalyasat dagiti dua a lugan nga agpada nga agpa-abagatan ket nag-overtake ti dump truck iti sarsarunnoenna a motorsiklo a nangitunda ti pannakadesgrasiada.
Gapu iti daytoy, kunana a nagsagaba ti nakana a sugat iti ulo ti nakamotorsiklo idinto a saan met a naan-ano ti nangiturong ti dump truck.
Inbatadna a naitaray ti biktima iti Bacarra Medical Hospital ngem naideklara a dead on arrival babaen ti attending physician a ni Dr. Marianne Shem Caraang.
Kabayatanna, bayat a maisursurat daytoy a damag ket saan pay a nagsarita dagiti agsumbangir a partido seknan iti nakaam-ames a desgrasia.
