LAOAG CITY – Natay ti nakamotorsiklo kalpasan a nadesgrasia iti Barangay Lagui-Sail ditoy siudad ti Laoag.
Segun ken ni P/Capt. Kester Arellano, Deputy Chief of Police ti Laoag City Police Station, ti biktima ket agtawen ti 21 ken residente iti Barangay 55-A Pandan ditoy siudad.
Inbatadna a basar iti inwayatda nga imbestigasion, kabayatan a dumaldalyasat ti nangiturong ti motorsiklo ket kellaat daytoy a napukawan ti kontrol ti manibela.
Gapu iti daytoy, naidungpar iti poste ti kuryente ti biktima rason a nagsagaba ti sugat iti nagduduma a paset ti bagina.
Inlawlawagna a nakasuot ti protective helmet ken saan a nabartek ti biktima ngem rumrummuar a napaspas ti panagpatarayna daytoy.
Kunana nga insigida a naitaray iti kaasitgan nga ospital ti biktima ngem naideklarar a dead on arrival.
Innayonna a nasipnget ti lugar a nakapasamakan ti nasao nga insidente.
