LAOAG CITY – Natay ti maysa a lalaki kalpasan a naidungpar ti naglugananna a motorsiklo iti puon ti kayo ti marunggay iti national highway iti Brgy. Guerrero iti ili ti Dingras.
Nabigbig ti biktima a nangiturong ti motorsiklo a Suzuki Raider 150 nga agmaris ti nangisit ken nalabbaga a ni Cosme Barangay Villaluz Jr., adda iti umno a tawen ken residente ti Sitio Balbalay, Brgy. Baresbes iti ili ti Dingras.
Basar iti Dingras Municipal Police Station, kabayatan a dumaldalyasat ti nakamotorsiklo ket kellaat a naidungpar iti puon ti kayo ti marunggay iti kurbaan a paset ti kalsada sakbay iti Cauplasan Bridge.
Gapu iti daytoy, dagus a naitaray ti biktima iti Dingras District Hospital babaen kadagiti napan nagresponde a personnel ti Municipal Disaster Risk Reduction and Management Office ngem naideklara a pimmusay babaen ken ni Attending Physician a ni Dr. Carl Vizcarra.
Nagsagaba ti nakana a sugat iti muging ti biktima ken nabartek idi napasamak ti desgrasia.
Kabayatanna, naammoan nga awan ti suot a protective helmet ti biktima.
