LAOAG CITY – Natay ti nakamotorsiklo kalpasan a natnag iti irigasion iti paset ti maar-aramid a bypass road iti Barangay 28 ditoy siudad ti Laoag.
Ti biktima ket maysa a lalaki, agtawen ti 27 ken residente ti Barangay 3 Loing iti ili ti Piddig.
Basar iti Laoag City Police Station, kabayatan a dumaldalyasat ti nangiturong ti motorsiklo a Yamaha Sniper 155 nga agturong nga agpa-abagatan ket kellaat a napukawan ti kontrol ti manibela a nangitunda ti pannakatnagna iti irigasion.
Gapu iti daytoy, nagsagaba ti driver ti motorsiklo ti sugat iti nagdudma a paset ti bagina nga insigida a naitaray iti Governor Roque B. Ablan Sr. Memorial Hospital para iti naan-anay a pannakatamingna.
Nupay kasta, naideklarar a dead on arrival ti biktima babaen iti attending physician a ni Dr. Dela Cruz.
Naammoan nga awanan ti driver’s license, saan a nakasuot ti protective helmet ken reflectorized vest ti biktima idi napasamak ti disgrasia.
