LAOAG CITY – Natay ti nakamotorsiklo kalpasan ti panagdinnungparda iti maysa a kurong-kurong iti bypass road iti Brgy. 57, Pila ditoy siudad ti Laoag.
Nabigbig ti nangiturong iti kurong-kurong a ni Althea Joyce Alipio y Menor nga agtawen iti 20 kaduana a nakalugan da Marjun Alipio y Togonon, agtawen iti 15, Vince Xairex Agcaoili y Manglanlan, agtawen iti 17, Philip De Leon y Alipio, agtawen iti 20, John Rafael Orcino y Alipio, agtawen iti 21 nga agpapada dagitoy a residente iti Brgy. 60-B, Madiladig ditoy siudad ti Laoag.
Idinto a nabigbig met ti biktima a pimmusay a driver ti motorsiklo a Suzuki Raider Model 2023 a ni Mark Angelo Gregorio, agtawen iti 21 ken residente iti Brgy. Casilian iti ili ti Bacarra.
Basar iti Philippine National Police ditoy siudad ti Laoag, kabayatan a dumaldalyasat ti kurong-kurong nga agpa-amianan ket nag-U-turn a nangitunda ti pannakaidungpar ti motorsiklo nga agpa-abagatan iti ligay iti sidecar ti kurong-kurong.
Gapu iti daytoy, natulid ti nakamotorsiklo idinto nagtalinaed a nakalugan dagiti adda iti kurong-kurong nga agpapada dagitoy a nagsagaba ti sugat iti nagduduma a paset ti bagida rason a naitarayda iti Governor Roque B. Ablan Sr. Memorial Hospital ngem naideklara a dead on arrival ti driver ti motorsiklo babaen iti Attending Physician ni Dr. Ricarte Caday idinto a nakaruar met laeng a dagus iti balay-pagagasan dagiti naglugan iti kurong-kurong.
Kabayatanna, naammoan iti imbestigasion a nakasuot ti helmet ken reflectorized vest ti nakamotorsiklo idi napasamak ti desgrasia.
