LAOAG CITY – Natay ti driver ti motorsiklo kalpasan ti panagdinnungparda iti maysa a kotse iti national highway ti Barangay Baduang iti ili ti Pagudpud.
Ti biktima a nangiturong ti motorsiklo a Black Suzuki Raider 150 ket maysa a lalaki, agtawen ti 20 ken residente ti Barangay Poblacion 2 iti ili ti Pagudpud.
Ti driver ti kurong-kurong ket maysa a lalaki, agtawen ti 45 ken ti kaduana ket maysa a lalaki, agtawen ti 52 nga agpada dagitoy a residente ti Barangay Subec iti ili ti Pagudpud.
Ti driver ti kotse a Gray Toyota Vios ket maysa a lalaki, agtawen ti 30, naasawaan ken ti kaduana ket maysa a babai, agtawen ti 30, naasawaan nga agpada dagitoy a residente ti Barangay Samonte, Quezon, Isabela.
Basar iti Pagudpud Municipal Police Station, kabayatan a dumaldalyasat ti nakamotorsiklo nga agturong nga agpa-abagatan ket nadungparna ti likud a paset ti kurong-kurong nga agturong met iti kapada a direksion isut gapuna a napukawan ti kontrol ti manibela.
Gapu iti daytoy, napan iti sabali a linya ti kalsada ti nakamotorsiklo a nangitunda met ti panagdinnungparda iti kotse.
Nagsagaba ti sugat iti nagduduma a paset ti bagi ti driver ti motorsiklo nga insigida a naitaray iti Pagudpud Adventist and Wellness Center iti Barangay 1 iti ili ti Pagudpud babaen kadagiti nagresponde a kameng ti Bureau of Fire Protection para iti pannakatamingna ngem indeklarar ti attending physician a ni Dr. TJ Sandel a dead on arrival ti biktima.
Kabayatanna, ti driver ti kurong-kurong ken ti kaduana ket nagsagaba ti sugat iti nagduduma a paset ti bagida ken insigida a naitaray dagitoy iti Rural Health Unit iti ili ti Pagudpud idinto a saan met a naan-ano dagiti nakalugan ti kotse.
