LAOAG CITY – Natay ti maysa a lalaki kalpasan a naidungpar ti naglugananna a motorsiklo iti Hino Truck iti Brgy. Caruan iti ili ti Pasuquin.
Segun ken ni P/Maj. Johnveil Maramag, Hepe ti Pasuquin Municipal Police Station, nabigbig ti biktima a ni Marlon Piano y Managad, agtawen iti 48, naasawaan ken residente ti Brgy. Bobon iti ili ti Burgos idinto a nabigbig met ti nangiturong ti Hino Truck a ni Cris Abuyaan y Yagin, agtawen iti 41 ken residente iti Centro East, Santa Teresita, Cagayan.
Inpalgakna a kabayatan a dumaldalyasat ti nakamotorsiklo ket kellaat a napukawan ti kontrol ti manibela a rason ti pannakatulidna agingga a napan isuna iti sabali a linya ti kalsada a nangitunda ti panagdinnungparda iti Hino Truck nga agpa-abagatan.
Gapu iti daytoy, inbatadna a nagsagaba ti nakana a sugat ti driver ti motorsiklo kangrunaanna iti paset ti ulo ken imana no sadinno a rumrummuar pay ti tulang ti imana.
Kunana a dagus met a naitaray iti kaasitgan nga ospital ti biktima ngem naideklara a dead on arrival.
Inlawlawagna a rumrummuar iti imbestigasionda a napaspas ti taray ti nakamotorsiklo isu a dakkel ti posibilidadna a saanna a naripar ti sarsarunnoena a tanker truck.
Innayonna a maiyur-uray pay laeng ti agbalin a desision ti pamilia ti biktima maipanggep iti napasamak a desgrasia.
Kabayatanna, naammoan nga agtartrabaho ti biktima iti maysa a Private Construction Company ken agawid koman idi napasamak ti insidente.
