LAOAG CITY – Natay ti driver ti motorsiklo kalpasan ti panagdinnungparda iti maysa nga SUV iti bypass road iti Barangay Sta. Maria ditoy siudad ti Laoag.
Ti nangiturong ti SUV a Mitsubishi Adventure ket agtawen ti 37, naasawaan ken residente iti nasao a barangay idinto a ti driver ti motorsiklo nga Honda Wave 100 ket maysa a lalaki.
Basar iti Laoag City Police Station, kabayatan a dumaldalyasat ti SUV nga agturong nga agpa-amianan ket nag-overtake ti nakamotorsiklo nga agturong nga agpa-abagatan a nangitunda ti panangdinnungparda.
Gapu iti daytoy, nagsagaba ti sugat iti nagduduma a paset ti bagi ti driver ti motorsiklo ken insigida a naitaray iti Gov. Roque B. Ablan Sr. Memorial Hospital para iti pannakatamingna ngem naideklar a pimmusay kabayatan a maag-agasan.
