LAOAG CITY – Naipadanon iti Ilocos Norte Electric Cooperative (INEC) ti problema dagiti agindeg iti Sitio Banitog Bgy. 2 iti ili ti Paoay a nakapsot a boltahe ti kuryente a sumsumrek kadagiti balbalay da.
Daytoy ti pinasinkedan ni Mr. Noel Andres, information officer ti INEC.
Kuna na a mismo pay kedti a ni Dir. Dr. Julito Catubay a makinsakop iti nasao nga ili ti nangipadanon iti board iti kaudian a board meeting da.
Inpanamnama ni Andres ti insigida a pannakaaktuar ti nasao a problema apaman a sumangpet dagiti materyales a ginatang da.
Kuna ni Andres a no apay a nakapsot ti boltahe iti nasao a lugar ket gapu ta bassit ken daanen ti linya isu a nairekumendar iti dadakkel a linya a maisukat iti agdama a linya.
Maipalagip nga idi kalman ket mismo a dimatag ditoy Bombo radyo dagiti maseknan a residente iti nasao a lugar a nangipadanon da ti nasao a problema gapu ta nabayagen nga indanon da ngem awan ti aksiyon na.
