LAOAG CITY – Maiyun-una a maipaayan dagiti kangrunaan nga agkasapulan iti relief packs wenno dagiti nakaro a naapektaran iti iduduprak ti Bagyo Egay ditoy probinsya.
Daytoy ti inlawlawag ni Mrs. Perlita Cabello, mangidadaulo ti City Social Welfare and Development Office ditoy ciudad ti Laoag.
Rakurak na daytoy kalpasan nga adda dagiti arungaing a maipagarop a saan pay a naipaayan ti tulong kas iti pannakaipaay ti relief goods.
Segun kenni Cabello, dagiti nagbakwit iti kangitingitan ti bagyo ti inpaayan da ti tulong nga isu ti inusar dagiti residente bayat nga adda da iti evacuation center.
Inlawlawag na a kadagitoy ket agaw-awat da metten ti partial reports dagiti nagduduma a barangay nga isu ti pagibasaran ti lokal a gobierno a mangiyalokar iti kada barangay.
Kunana a karaman kadagiti maipaayan ti tulong ket dagiti residente wenno pamilya a napan pay laeng iti pagtaengan ti kabagyan da iti kapigsa ti bagyo ken amin dagitoy ket makita iti report ti barangay.
Mainaig iti daytoy, inpanamnama na nga uray dagiti saan a nagbakwit ket maipaayan met laeng iti tulong ken ti pagibasaran da ket ti report wenno assessment ti Barangay Risk Reduction and Management Council.
Inpetteng na a naapektaran iti amin iti tudo ngem adda dagiti residente a saan met nga apektado ti layos.
Kabayatanna, kunana nga umaboten iti 2,077 ti naipaayan ti relief packs iti uneg ken ruwar ti evacuation center ngem agtultuloy pay ti panangipaay da kadagitoy.
