LAOAG CITY – Nakaro a pannakakigtot ken pungtot ti agar-ari kadagiti tattao kalpasan ti panangpatay dagiti armado a lallaki iti 26 a turista iti Pahalgam, maysa a nalatak a destinasyon iti Jammu ken Kashmir idiay India.
Malaksid kadagiti natay ket adda da pay dagiti nasugatan no sadinno a kaadoan kadagitoy ket kritikal ti kondisyon da.
Agpapan ita ket awan pay ti kumpirmasyon no ania a grupo ti nagisaknap iti kinadamsak ngem ti maitudtudo ket ti Pakistan-based organisation Lashkar-e-Taiba ti adda iti likudan ti nakaam-ames a pasamak.
Mainaig iti daytoy, saanen nga inleppas ni Prime Minister Narendra Modi ti panagbisita na idiay Saudi Arabia gapu iti nasao a pasamak.
Naamoan a ti Kashmir ket agpada a tagtagikwaen ti India ken Pakistan, ken sumagmamanon a dekada ti insurhensya kontra iti Delhi a nakapukawanen ti rinibo a biag, ngem ti panagatake kadagiti turista ket mabilbilang laeng.
Kabayatanna, inpasingked ni Pakistani Defence Minister Khawaja Asif nga awan ti pakainaigan ti pagilian da iti napasamak a panagatake iti Pahalgam.
