LAOAG CITY – Naipaiman iti Philippine Drug Enforcement Agency (PDEA) ti maipagarop a shabu a nakita iti igid ti baybay iti ili ti Paoay.
Segun kenni Police Captain Jackson Sugayen, ti chief of police ti Philippine National Police iti ili ti Paoay, nakita daytoy ni Erwin Agdeppa, agtawen ti 37, maysa a mangalap ken residente iti Barangay Masintoc iti nasao nga ili.
Inbatad na a sumurok kumurang maysa a kilo ti shabu nga agbalor ti innem a milyon a pisos.
Inlawlawagna a basar kenni Agdeppa, napan na pinakan dagiti taraken na nga ikan ken agkalap ngem ditoy metten a nakita na ti nakalukat a supot.
Kunana nga idi nakita na ti linaon daytoy ket dagus nga inpakammo na iti Barangay da ken dagiti opisyal ti nangireport kadagiti otoridad.
Mainaig iti daytoy, inbatad na nga iti imbestigasyon da, ti nakita a shabu iti igid ti baybay ket karaman kadagiti ummunan a nakita iti kabaybayan a paset ti Ilocos Norte, Ilocos Sur ken iti probinsya ti Pangasinan.
