LAOAG CITY – Inyestorya ni Mrs. Siony Ucol Gano, maysa a residente iti ili ti Sarrat ti dakkel a billing statement a naawat na manipod iti Ilocos Norte Electric Cooperative.
Segun ken ni Gano, arig a nagdoble ti nailanad iti billing statement iti laksid nga awan ti nagbaliw iti panagkonsumo da ti kuryente.
Inbatad na nga iti sumaruno nga aldaw kalpasan a naawatda ti billing statement idi sabado ket inpadas na a kinita ti kuntador da ket dita a saan nga agpada ti nagpakita a nakonsumo a kuryente.
Kuna na a manipod iti 19, 751-kilowatt hour nga adda iti naited a billing statement ket 19,576 laeng ti adda iti kontador.
Gapu iti daytoy, inpakaammo na a dagus a nagturong iti opisina ti INEC ken dita nga inlawlawag na ti napasamak.
Inbatad na nga indatag na amin nga ebidensya ken dita a nabaliwan ti billing statement na ken agbayad ti basbassit a kantidad. Kabayatanna, nagballaag ni Gano a nasken a bantayan dagiti meter reader ken kitaen a dagus nu agpada ti adda iti billing statement ken kontador tapno maliklikan iti pannakasingir ti dakkel a kantidad.
