LAOAG CITY – Manamnama ti pannakadadael dagiti nakumpiskar nga iligal a paputok iti Ilocos Norte Police Provincial Office ita nga aldaw, Enero 3.
Daytoy ket babaen ti panangpalidlid ti pison kadagiti nakumpiskar nga iligal a paputok ditoy probinsia.
Naammoan a dumanon iti pakabuklan a 332 a boga ti nakumpiskar dagiti otoridad manipud kadagiti nagduduma nga ili ken siudad ditoy probinsia.
Mainaig iti daytoy, kaadduan ti nakakumpiskaran ti boga ket manipud iti ili ti San Nicolas, Sarrat ken ditoy siudad ti Laoag.
Malaksid kadagiti boga ket adda pay dagiti paputok a nakumpiskar dagiti otoridad iti ili ti Dingras kalpasan nga awan ti naipakita kadakuda a business permit dagitoy.
Kabayatanna, idauloan da Atty. Gerald Gallardo, mangidadaulo ti Department of the Interior and Local Government ken P/Col. Frederick Obar, Provincial Director ti Ilocos Norte Police Provincial Office ti pannakadadael dagiti nakumpiskar nga iligal a paputok.
