LAOAG CITY – Dumanonen iti nakurang a 10 a milyon a pisos ti balor dagiti nadadael iti kabanbantayan kadagiti sumagmamano nga ili ditoy probinsia gapu kadagiti mapaspasamak a grass fire ken forest fire.
Segun ken ni Mr. Victor Dabalos, ti mangidadaulo iti Provincial Environment and Natural Resources Office, dagus a nangbukel ni Gov. Matthew Marcos Manotoc ti Ilocos Norte Fire Fighting Group a bukbuklen dagiti kameng ti Department of Environment and Natural Resources, Philippine National Police, Bureau of Fire Protection, Marines ken Philippine Airforce.
Inbatadna a dagiti nakairekord ti kadakkelan ken kalawaan nga uram ket iti paset iti ili ti Solsona, Piddig, Carasi, Vintar ken Pasuquin.
Inlawlawagna a dumanon iti nasurok a lima ribu a kabanbantayan ti naapektaran iti napasamak a grass fire ken forest fire ditoy probinsia.
Kunana a dakkel a pannubok kadakuada ti panangprotehir kadagiti plantasion iti Greening Program ti Gobierno Probinsial ti Ilocos Norte gapu kadagiti mapaspasamak nga uram.
Inpalgakna a ti dakkel a karit kadagiti kameng ti Ilocos Norte Fire Fighting Group ket panangsebsebda iti apoy isu a masapolda ti panagusar ti helicopter.
Immuna iti daytoy, inpakaammo ni Fire Superintendent Roxanne Parado, ti Provincial Fire Marshal ditoy Ilocos Norte nga addan ti pakabuklan a nasurok 70 a fire incidents sipod simrek iti tawen 2024 no sadino 43 ti nairekord a fire incidents idi bulan laeng ti Marso a Fire Prevention Month.
