LAOAG CITY – Inbatad ni Alvin Pasion iti Sitio Dibua Proper, Barangay Dibua South ditoy ciudad ti Laoag a saanda a ninamnama ti pannaka-kuryente a poon ti nakatayan ti ina na a ni Merly Biala, agtawen ti 50 ken residente met laeng iti nadakamat a barangay.
Iti eksklusibo nga interview ti Bombo Radyo Laoag ken ni Pasion, inbatad na a sakbay a nakuryente ti ina na ket nagin-innangaw da pay laeng.
Inlawlawag na nga aggiddan da koma nga aglaba iti ina na ngem naud-udi a napan iti bomba gapu ta nangan pay laeng.
Kuna na a kabayatan ti pannangan na ket nangngeg na a nagpatulong ti ina na.
Inpagarop ni Pasion a naulaw laeng ti ina na ngem idi mapanna arayaten ket nakuryente isut gapuna nga inibbatan na ken napanna inikkat a dagus ti saksakan ti extension a naka-konektar iti water pump.
Innayon na nga idi naikkat na ti saksakan ti extension kt naipegget ti ina na iti handle ti bomba ken idi mapan na asitgan ti ina na ket nakita na ti dara iti muging na.
Segun ken ni Pasion, ti palawag kadakuada dagiti electrician ket ti kuryente a kimmamang iti bomba a nakakuryentian ti biktima ket aggapo iti motor pump nga adda a mismo iti asideg ti bomba da.
Naitaray ti biktima iti Saint Camillus De Lellis General Hospital ditoy ciudad ti Laoag ngem pimmusay met laeng kabayatan a maag-agasan.
