LAOAG CITY – Inpakaammo dagiti aglola iti Brgy. Caaocan ditoy siudad ti Laoag ti kapadasan da maipanggep iti nangina a singir iti plete ti maysa a tricycle driver.
Segun iti lola a ni Janeth Andres, naklaat idi naamoan na a nagsingir ti 50 a pisos iti tunggal maysa kadagiti uppay a naglungan iti tricycle nga addaan ti Plate number a 0109.
Daytoy met ti kinumpirmaran ti apoko na a nabigbig laeng iti nagan nga Angel ken isu a mismo ti nakapadas iti nangina a singir iti plete.
Inbatad ni Angel nga dagiti kakadua na a naglugan iti tricycle ket pada na nga estudyante ken adda ti maysa a senior citizen.
Kuna na nga uray isuna ket nakigtot idi 50 a pisos ti singir ti driver ti tricycle a plete iti laksid a 35-40 a pisos laeng ti dati a plete da manipod iti sentro ditoy siudad.
Innayun na nga awan ti nagtutulagan da iti tricycle driver seknan iti masingir a plete rason a nakigtot idi dakkel ti innala daytoy.
Mainaig iti daytoy, inbatad ni PNP-Traffic division chief PMSgt. Eric Bumagat ditoy siudad a mapabayaban intuno bigat iti opisina da ti maseknan a driver ti tricycle pakairaman ti operator daytoy.
Inlawlawag na a posible a maipataw ti overcharging ken overloading kadagiti maseknan gapu iti nasao a pasamak.
