LAOAG CITY – Inlawlawag ni Brgy. Chairman Ronel Ranay iti Brgy. 10 Estancia iti ili ti Pasuquin ti saan a dagus a pannakasukon iti border dagiti kabarangayanna a nagpositibo iti antigen test.
Segun ken ni Ranay, adda ti responsibilidad ti barangay a mangsukon kadagiti sumangpet ditoy probinsya a kabarangayanda.
Nu pay kasta, inbatad na a ti laeng Rural Health Unit (RHU) wenno MDRRMO ti mabalin a mangsukon kadagiti agpositibo iti antigen wenno rt-pcr test.
Gapu iti daytoy, kuna na a naiyur-uray ti panangsukon ti RHU kadagiti uppat a kabaragayanna a nagpositibo iti antigen sakbay a naipan dagitoy iti barangay isolation facility.
Immunan nga inpakaammo ni Ranay a tinawagan dagiti maseknan a nagpositibo iti antigen ti RHU ngem maipagarup nga awan dagiti nagsungbat.
Innayun na nga adda met ti panangtawag na iti RHU ngem kaskasdi nga awan met ti naawat na a sungbat.
Kabayatanna, inbatad ti kapitan a basar iti palawag dagiti agpapaay iti RHU ket nairana nga adda dagiti emerhensya iti ili ti Pasuquin idi nagkiddaw a masukon dagiti nagpositibo iti antigen test.
Gapu iti daytoy, naiprayoridad ti emerhensya sakbay a nasukon dagitoy iti malem idi Enero 7.
Iti agdama ket nagtalinaed iti barangay isolation facility dagiti uppat a nagpositibo iti antigen test.
Inpakaammo met ni Ranay nga adda ti nakasagana a lugan ti barangay nu bilang adda dagiti kabarangayanna na nga agkalikagom a masukon iti border control laketdi negetibo dagitoy iti aniaman a test.
