LAOAG CITY – Inlawlawag ni Engr. Maria Teresa Bacnat, OIC iti Provincial Agriculture Office a no nalamiis ti panawen ket adda ti epekto na iti mula a mangga, lasona ken bawang nga isu ti kangrunaan a produkto ita a panawen.
Segun kenni Bacnat, karaman ditoy ti panagadda ti fungus kadagiti mula ngem mabalin met a maprebentaran.
Kunana a no saan a maprebentaran ket dakkel ti epekto na ngem kabisado metten dagiti growers ti ar-aramiden da no kastoy a nalamiis ti panawen.
Karaman kadagiti mabalin nga aramiden dagiti growers ket ti panag-spray iti danom tapno maikkat ti linna-aw iti bulong; ken ti panang-apply ti fungicide kadagiti apektado a mula.
Inpakammo pay ni Bacnat nga adda ti nakasagana a fungicide a a libre a maipaay kadagiti farmers iti INREC, ti Provincial Satellite Station ti DA Region 1 no sadinno ket makikoordenar da laeng iti opisina na.
Kabayatanna, kuna ni Bacnat a basar iti panagmonitor da ket awan pay ti naimaldit a nadadael a produkto gapo iti nalamiis a panawen.
