LAOAG CITY – Agtultuloy pay laeng ti mapaspasamak a dakkel nga uram idiay Central Maui iti isla ti Maui, Hawaii.
Segun ken ni Bombo International Correspondent Manny Pascua, idi pay kalman a nangrugi ti nasao nga uram a maysa a “grass fire”
Kuna ni Pascua nga umabuten ti 25,000 nga acres wenno kaibatugan ti 10, 117 nga ektrayan ti kalawan ti nasao nga uram.
Nagtitinulong metten dagiti umili iti nasao a lugar tapno masebseban ti nasao nga uram babaen iti panangusar da ti helicopter, fietrucks, ken truck dagiti pribado a tattao.
Rumrumwar a ti nasao a lugar ket dati a pagmulmulaan ti unas.
Dagiti kangrunaan nga apektado a lugar ket ti Haleakala Highway ken Halihaway Highway.
Napabalakadan metten dagiti residente nga asideg ti uram iti panagbakwitda inggana a saan saa pay a madanon ti apoy.
Adda da metten poste ti kuryente ti Maui Electric Company ti mauram.
Am-amwen metten dagiti otoridad no adda pannakainaig dagiti nagdinungpar a dua a lugan iti nasao a lugar idi Lunes ti nasao a grasfire.
