LAOAG CITY – Kinontra ni dati a Senate President Juan Ponce Enrile ti panagdardaras ti sumagmamano nga agpanpanday linteg a maileppasen ti pannakatratar iti prangkisa ti ABS-CBN.
Iti panagatendar ni Enrile iti panagdengngeg ti Senate committee on public services a temporaryo nga indaulwan ni Sen. Sherwin Gatchalian, inbaga ti dati a senador ti kapanunutan na iti Senado.
Segun iti agtawen ti 96 a dati nga agpanpanday linteg, saan a nainkalintegan a nakadepende ti kaadoan a Filipino iti panagkalap ti damag ken ammo manipod iti telebisyon laeng.
Inpetteng ni Enrile a nalawlawa ti madanun ti radyo a pagalaan kadagiti napapateg nga impormasyon dagiti umili, uray dagiti adda kadagiti adayo a lugar.
