LAOAG CITY – Ibilang pay laeng ti PNP iti Ilocos Norte a nalinak, naurnos ken natalna ti probinsiya kadagitoy a panawen.
Segun ken ni P/Supt. Jay De Guzman, Deputy Prov’l Dir. For Operations ti Ilocos Norte Prov’l Office, inbasar na iti daytoy a kaudian a rakurak da kadagiti report nga inpadanon dagiti kakadua da manipud kadagiti istasyon ti pulis iti agtultuloy a panagmonmonitor da.
Kuna na nga agingga kadagitoy ket awan pay dagiti namonitor da a nabukel wenno mabukbukel a private armed group.
Nupay kasta, inbatad ni De Guzman nga itultuloy da latta ti agmonitor kageddan iti panangdawat da ti tulong ti publiko a mangsipot kadagiti mabalin a mangbukel iti armada a grupo ditoy probinsiya a mabalin a maaramat a pammutbuteng para iti 2019 midterm elections.
