LAOAG CITY – Umabot iti 60 a ribo a pisos ti balor dagiti nadadael iti naminpinsan a pannakauram ti maysa a pagtaengan iti Barangay 4 ditoy ciudad ti Laoag.
Daytoy ti kinumpirmaran ni Fire Senior Inspector Ronald Castillo, Fire Marshall ti Bureau of Fire Protection ditoy ciudad.
Segun kenni Castillo, ti nasao a pagtaengan a kukua ni Alejandro Ribay ken ti kabsat na ket naaramid babaen kadagiti light materials rason nga alisto a nagramram ti apoy.
Inbatad na idi nakadanon da iti lugar ket nauraman ti balay ken nairaman ti sumagmamano a paset ti kaabay na a karinderya.
Nupay kasta, kalpasan ti 10 a minutos ket nakontrol met laeng dagiti bombero ti apoy ken dagus a naiyuswat ti imbestigasyon.
Kuna a basar iti palawag ti agtagikua ket awan isuna iti pagtaengan na idi napasamak ti uram.
Agtultuloy met ti naun-uneg nga imbestigasyon dagoto bombero no anya ti namunganayan ti nadakamat nga uram.
Kabayatanna, nagpalagip ni Castillo iti publiko nga agannad ken agalerto tapno maliklikan ti uram.
