LAOAG CITY – Maselebraran ti maika-100 a tawen a panagkasangay ni Nana Magdalena Galinato Gamayo ita nga aldaw, Agosto 13 a maibilang kas maysa a National Living Treasure gapu iti agtultuloy a panagabelna iti baet ti kinataengnan.
Segun ken ni Mr. Gervy James Gumarit, mangidadaulo ti Provincial Communications and Media Office, naipasngay ni Nana Magdalena idi tawen 1924 no sadinno nga iti tawenna a 15 ket ditoy a rinugianna a sinursuro ti panagabel.
Inlawlawagna a sipod idin ket nagbalinen nga hiligna ti naisangsangayan a klase ti artistry agingga a nadanonna ti maika-sangagasut a tawenna ita nga aldaw.
Kunana a daytoy ti nagbalin a rason iti pannakaipaay kenkuana ti pammigbig kas Gawad ng Manlilikha gapu iti dedikasion nga inpakitana a panangitultuloy a panagbalin kas Master Weaver iti Abel Iloko iti baet ti tawenna.
Mainaig iti daytoy, segun ken ni Gumarit nga adda dagiti naisagana a programa kas panangrambak iti nasao a banag no sadinno nga immunan a naiyuswat iti daytoy nga aldaw ti THE INABEL; A Vibrant Tradition, Forever Truly Ilocano iti Sacritan Elementary School nga isu ti nagbasaan ni Nana Magdalena.
Naammoan a ti naisangsangayan a bisita ket ni Prof. Emeritus Norma Respicio iti University of the Philippines Diliman no sadinno ditoy a naisuro kadagiti agtutubo ti kabibiagan ni Nana Magdalena ken pananggutigot kadagiti agtutubo a maitultuloy iti panangarakupda iti kultura ken tradision ditoy probinsia kas inaramid ni Gamayo.
Malaksid iti daytoy, inbatadna a naiyuswat ti typical ilocano bithday celebration iti Plaza del Norte iti oras ti alas sais no sadinno nga inatendaran daytoy iti pamiliana pakairamanan dagiti opisial ti gobierno ditoy probinsia.
Kabayatanna, adda pay dagiti naibandera a ladawan ni Nana Magdalena Gamayo iti nagduduma a paset ditoy probinsia nangnangruna ditoy siudad ti Laoag ken ti sangoanan ti Kapitolio Probinsial a mangipasimudaag a ti pannakadanonna ti 100 ket balligi iti intero a probinsia a kas pannakapreserbar ti kinabaknang ti kultura ken tradision ditoy Ilocos Norte.
Maipalagip nga inruar ti National Commission for Culture and the Arts ti Birth Centennial logo ni Manlilikha ng Bayan Magdalena Gamayo a nangrugi iti 100 nga aldaw a panagbilang iti daytoy a napateg nga okasion.
Immuna iti daytoy, panggep ti nasao a selebrasion a manggutigot kadagiti ub-ubing a kaputotan tapno ad-adda a maiwaragawag ti naisangsangayan a tawid ni Nana Magdalena ken dagiti manayon a pategna a nangsukog iti nabingbingay a pakasaritaan ken tradision ti komunidad nga Ilokano ken ti kultura a tawid ti pagilian.
