LAOAG CITY – Inlawlawag ni Prof. Orlino Mandac, maysa nga economist iti Mariano Marcos State Univeristy iti siudad ti Batac ti epekto ti panaggaraw ti piso kontra iti dolyar.
Segun ken ni Mandac, nu nangato ti exchange rate ditoy pagilian ket adda ti sumagmamano a sektor a positibo ti maitunda daytoy.
Kuna na a maysa ditoy dagiti agawat ti kwarta manipod iti abroad gapu ta nangato ti sukat iti piso ti maysa a dolyar.
Mainaig iti daytoy, inbatad na a dakkel nga epekto pay daytoy kadagiti exporters gapu ta dagiti produkto a mailako ket magatang iti nangato a presyo.
Kabayatanna, inpetteng na nga iti baet ti positibo nga epekto daytoy kangrunaan iti ekonomiya ket adda ti negatibo nga itunda na.
Inbatad na a malaksid a maapektaran ti Pilipinas ket apektado met ti ekonomiya ti estados unidos ken isu ti pakakitaan nga adda ti ngumatngato nga inflation rate.
Innayun ni Mandac a saan met a manamnama nga agtultuloy ti panagbaba ti gatad ti piso kontra iti dolyar gapu ta adda ti aramiden nga interventions ti gobierno ti estados unidos.
