LAOAG CITY – Inpeksa ni Mr. Jayson Molina ti kapadasan ti anakna a maipagarop a nangato a singir ti plete ti maysa a tricycle driver ditoy siudad ti Laoag.
Segun kenkuana, naglugan ti anakna a kadwana ti nasinged met laeng kenkuana iti dakkel a mall ditoy siudad ngem sakbay a naglugan ket sinaludsod ti anakna no mano ti plete ket kinuna ti driver a P150 tunggal maysa no sadinno a pakabuklan ti P300 a pisos.
Kuna ti driver a ti singir ti plete ket gapu ta rabiin ken adayo ti lugar a pagpaitulodanda.
Idinto ta makadanondan ket inyawat latta ti anaknan ti pleteda ngem kinasarita ni Molina ti driver ti tricycle no sadinno a sinaludsodna no apay a nangina ket ditoyen a kuna ti driver a gapu ta rabii ti biahe ken kasapulan ti kanayonan a plete.
Mainaig iti daytoy, ti nagluganan ti anakna ket maysa a Barangay franchise no sadinno nga agduma ti plete ti City franchise ken Barangay franchise.
Impetteng ni Molina a nangina unay ti singir ti plete gapu ta rumbeng laeng kuma a P250 ti maiplete manipud ti dakkel a mall nga agturong iti ili ti Vintar.
Masdaaw ni Molina gapu ta aglalaok ti pilaan ti tricycle iti nasao a dakkel a mall no sadinno nga adda pagalagadan da a ti laeng agpila ket dagiti manipud Barangay 51-B Nangalisan ken City franchise.
Innayonna a masapol ti insigida a tignay ti problema gapu ta saan laeng nga isu ti maseknan nudiket dagiti pay kaadoan a City franchise no sadinno a kunana a dakdakkel ti sapol dagiti Barangay franchise ngem iti City franchise.
Kabayatanna, pinadas nga innala ti Bombo Radyo ti takder ti Sangguning Panlungsod ngem kunada nga addanto maangay a panagtataripnong mainig iti nasao a problema.
