LAOAG CITY – Nangipeksa ti panagdanag ni Kabataan Partylist Rep. Raoul Manuel iti nangato a viewing ditoy Pilipinas kadagiti PornHub iti internet a napeggad iti sulisog kadagiti agtutubo a Pinoy.
Iti panagdengngeg ti House Committee on Basic Education and Culture maipanggep iti pannakaipatungpal ti Comprehensive Sexuality Education ti Department of Education, kuna ni Manuel nga idi 2023 ti Pilipinas ket adda iti maikadua a top viewer ti pornHub.
Inbatadna a ti Pilipinas kas maysa a bassit a pagilian ket karaman iti Top 5 kadagiti mahilig agbuya kadagiti PornHub no sadinno no saan a mabayabayan dagiti nagannak dagiti annakda ket maaddaan ti kuryosidad ken mabalin a tuladenda daytoy a saanda nga ammo ti itundana.
Idi 2024 ket maikatlo met ti Pilipinas iti kategoria ti nangato a viewership iti Pornhub no sadinno a ti Estados Unidos a maysa a dakkel a pagilian ti immuna ken maikadua ti France.
Inlawlawag ni Manuel, kas pannakabagi dagiti agtutubo, makaalarma ti panagusar ti pornograpia wenno panagbuya kadagiti sensitibo a content ditoy Pilipinas ken ditoy a mabalin nga agbiddot dagiti agtutubo no kasano ti umiso a makirelasion.
Inpetteng pay ni Manuel a ti Department of Education ket nasken a maaddaan ti sistema tapno siguradoen a dagiti Pilipino nga estudiante ket pudno ken umiso a makasursuro tapno saanda a maiyaw-awan ti nasayaat nga aramid.
