LAOAG CITY – Inbatad ni Dr. Rogelio Balbag, ti provincial health consultant ditoy Ilocos Norte nga adda dagiti pasilidad iti Governor Roque Ablan Senior Memorial Hospital ditoy siudad ti Laoag ti nainanugaran.
Kuna ni Balbag a daytoy ket paset ti hospital development nga inrubwat ni Governor Matthew Marcos Manotoc.
Segun ken ni Balbag, umabot iti 80 a milyon a pisos ti naiyalokar iti nagduduma a pasilidad ken dadduma a napapintas iti serbisyo ken kasapulan nga equipments ti ospital.
Inbatad na a karaman kadagiti baro a nainanugaran a pasilidad ket ti napabaro a ward building, multipurpose building, warehouse building ken pediatric intensive care unit.
Kuna na a karaman pay ditoy ti napabaro nge operating room, dietary building, garahe ti ambulansya ken morgue pakairamanan ti naurnos nga isolation facility para kadagiti kaso ti covid-19.
Mainaig iti daytoy, inpakaammo ni Balbag a sipud narugyan ti hospital development ti gobernador, addan tallo a tawen ti napalabas ket umaboten iti 166 a milyon a pisos ti nausar manipod iti provincial development fund.
Kabayatanna, inbatad ni Balbag a kageddan ti pannakalukat kadagiti baro a pasilidad ken ad-adda a pannakapadur-as ti serbisyo iti GRASMH ket posible nga agkaspaulan ti ospital ti nayun nga empleado ng agserbi iti umili.
