LAOAG CITY – Nasentensiaan ti maysa a lalaki idiay Taiwan iti lima a bulan a pannakaibalud kalpasan nga inusarna ti robot a vacuum cleaner a sililimed a nang-video iti asawana a kaduana ti ay-ayatenna.
Nagkasar ti agassawa idi 2021 ken addaanda iti balay a pagbakasionan a sagpaminsan laeng a sarungkaranda.
Idi 2023, nagsuspetsa ti lalaki kalpasan a nakakita iti di pamiliar a sipilio iti balay. Iti CCTV footage ti parking area, nakitana pay ti maysa a lalaki a dati a mangibaba iti asawana iti trabaho.
Idi kinomprontarna ni baketna, naglikudanna a nakidenna kenkuana. Tallo a bulan kalpasanna, gimmatang ti asawa a lalaki iti robot vacuum para iti balay a pagbakasionan. Adda kamera ken communication features-na, ket kinunana a panggepna laeng a sorpresaen ti asawana babaen ti video chat iti babaen ti panangusar iti vacuum.
Ngem imbes a simple a kablaaw, nakitana ti asawana a nakaidda iti kama a kaduana ti lalaki a nakitana iti CCTV. Intuloyna ti nagrekord tapno makagun-od iti ebidensia. Natiliw dagiti dua nga agabrasa ken magmagna iti balay a lamolamo.
Gapu iti daytoy, inkaso ti lalaki ti asawana ken ti maipagarup nga ay-ayatenna para iti NT$2 milion. Pabor kenkuana ti desision ti korte ket binilinna ti agassawa a mangbayad iti NT$500,000 kalpasan a natakuatanda a nalablabes ngem ti panaggayyem ti relasionda.
Nupay kasta, indarum met ni baketna gapu iti nalimed a panagrekordna.
Kabayatanna, nasentensiaan met ti asawa a lalaki iti lima a bulan a pannakaibalud ken nagmulta iti NT$150,000.
