LAOAG CITY – Inpakaammo ni Fire Senior Supt. Roxanne Parado, ti firemarshall iti Bureau of Fire Protection ditoy probinsya nga alas-tres idi malem ket naan-anayen a nasebseban ti apoy iti napasamak nga uram iti kabanbantayan a paset iti ili ti Carasi babaen ti panagusar da ti dua nga air assets.
Inbatad ni Parado a karaman kadagiti nauram ket dagiti maibilang a napapateg a kayo a naimula idi 2014 ken 2018 babaen iti National Greening Program ti gobierno.
Kuna na nga umabot iti 50 nga ektarya a nakaimulaan dagiti kayo iti babaen ti National Greening Program ti naapektaran no sadinno a karaman dagiti nauram ket dagiti alibangbang, acacia, asaoti, pine tree ken narra.
Inlawlawag na a nabayag sakbay nga indeklarar da ti fire out gapu ta sinigurado da nga awanen ti possible a pangrugyan manen ti uram.
Mainaig iti daytoy, inpalgak ni Parado nga iti baet nga ar-aramiden da amin a kabaelan da tapno mapalagipan ti publiko seknan dagiti rumbeng nga aramiden tapno maliklikan ti uram, ngem saan latta a maliklikan gapu ta nakaugalianen dagiti dadduma a residente ditoy probinsya ti mapan aganop, agala ti buos ken uyukan, ket ti agpuur iti pagmulaan da iti kabanbantayan.
Gapu iti daytoy, nagpalagip manen ni Parado nga agbalin a responsable iti panagipatungpal iti nagduduma nga aktibidad iti kabanbantayan tapno maliklikan ti uram wenno forest fire.
Kabayatanna, kuna ni Parado a saanda a maitudo no residente iti ili ti Carasi ti possible a nakaitunda ti napasamak a forest fire gapu ta adda pay ti dadduma a pagnaan a mabalin nga usaren dagiti aggapo iti sabali nga ili.
Immunan a nagtitinnulong dagiti kameng ti Department of Environment and Natural Resources Office, Philippine Marines, Philippine National Police, Philippine Army, Bureau of Fire Protection, lokal a gobierno iti ili ti Carasi, Office of the Civil Defense – Region 1 para iti alisto a pannakasebseb ti apoy.
