LAOAG CITY – Ibilang ti Philippine National Police a nasolbaren ti kaso seknan ti napasamak a desgrasya iti by-pass road, bisinidad ti Barangay Tanguid ditoy ciudad ti Laoag a nakatayan ti maysa a babai.
Nabigbig ti pimmusay a ni Angelique Marcos, agtawen ti 31, naasawaan ken residente iti Barangay Buyon iti ili ti Bacarra.
Immunan a rimuar iti imbestigasyon dagiti kameng ti Philippine National Police nga agpada nga agpapa-amyanan ti kurung-kurung a nagluganan ti biktima no sadinno a ti driver ket ti asawa na ken kadwa da pay ti anak da nga agtawen ti lima ken ti Toyota Vios Sedan nga inturong ni Patrolman Robert de Leon, agtawen ti 26, kameng ti Aviation Security Group iti Laoag International Airport ken taga Baliwag, Bulacan.
Naamoan nga agsarsaruno laeng dagiti dua a lugan ken idi gandaten ni de Leon ti agovertake ket ditoyen a nasapgud na ti kurung-kurong a nangitunda ti pannakaregreg ti biktima a nagsagabaan na ti sugat iti nagduduma a paset ti bagina.
Naitaray ti biktima iti Governor Roque Ablan Senior Memorial Hospital ditoy ciudad ti Laoag ngem naideklarar a dead on arrival.
Saan met a naan-ano ti anak ken asawa ti biktima pakairamanan ti driver ti Toyota vios sedan.
Iti panagsasarita dagiti maseknan iti kwerpo ti pulisya ket napagtutulagadan da nga agbayad ni de Leon ti 200 a ribo a pisos iti pamilya ti biktima para iti magastos da iti ospital ken ti pannakaitabon ni Marcos.
