LAOAG CITY – Inbatad ni Barangay Chairman Apolinario Respicio Jr. iti Barangay Balaoi iti ili ti Pagudpud a maipagarop a gapu iti babai ti nagririan dagiti dua a lallaki a nagbinnagkong iti Sitio Lab-labig, Barangay Balaoi iti nadakamat nga ili.
Ti biktima ket agtawen ti 20, baro, helper ken residente ti Sitio Gaoa, Barangay Balaoi iti ili ti Pagudpud idinto a ti suspek ket agtawen ti 18, baro, helper ken tubo iti Zone 5, Barangay Bagu, Pamplona, Cagayan ngem agdama nga agnanaed iti nadakamat a barangay.
Kuna ni Respicio nga agarop alauna ti parbangon idi napasamak ti insidente no sadinno nga agpada a nakainom ti nasanger dagiti dua idi nagriri da ken saan a masinunuo no siasinno ti immuna a bimmagkong.
Inpakaammo na nga apaman a naamoan da daytoy ket nagresponde da a dagus iti lugar ken insigida da met nga intawag iti Philippine National Police.
Agpada a naitaray ti suspek ken biktima iti Bangui District Hospital ngem naiyakar dagitoy iti Mariano Marcos Memorial Hospital and Medical Center iti ciudad ti Batac.
Kabayatanna, inpanamnama ti kapitan nga ad-adda pay a paigetan da ti agbantay iti masakupan da a barangay iti baet nga adda ti ipatpatungpal da a curfew hours.
Immunan nga inrakurak ti Pagudpud Municipal Police Station nga iti imbestigasyon da, kabayatan nga agin-inum ti biktima ken ti suspek kaduada ti lima pay nga indibidual ket adda ti saan da a nagkinnaawatan.
Gapu iti daytoy, dinanog ti suspek ti biktima kalpasan na ket innala na ti kutsilyo iti bagna ket ditoy a binagkong na pay ti biktima iti namindua a daras.
Naamoan nga inagaw met ti biktima ti kitchen knife manipud iti suspek no sadinno a binagkongna met daytoy ti namindua a daras.
