LAOAG CITY – Inpetteng ti liderato ti Philippine National Police nga adda ti nagbalin a dakkel a papel dagiti barangay iti panangparmek ti illegal a droga iti bukod da a komunidad.
Iti maysa a rakurak, inbatad ni Philippine National Police Chief Police General Rommel Francisco Marbil a maysa daytoy a rason no apay a kasapulan a makaala ti suporta ti Barangay Anti-Drug Abuse Council.
Segun ken ni Gen. Marbil, makatulong daytoy tapno mapapigsa ti pannakaiyuswat dagiti intelligence gathering ti pulisya.
Innayon na nga agserserbi a frontliner kadagiti anti- illegal drug operations da ti Barangay Anti-Drug Abuse Council.
Malaksid iti daytoy ket dakkel pay a tulong daytoy kadagiti user ken pusher a mangabarwanan iti panagbiag.
Agserserbi dagiti miyembro ti Barangay Anti-Drug Abuse Council a mata iti komunidad da tapno a mamonitor dagiti ilegal a droga a maibagbagsak ken mailaklako iti bukod da a lugar.
