LAOAG CITY – Inbatad ni Mr. Rommel Pascua, Marine Scientist ken instructor iti Mariano Marcos State University (MMSU) a napateg ti pannaka-update ken pannakaipasa ti ad-ado pay a linteg para iti pannakaprotehir ti marine ecosystem ken marine environment ditoy pagilyan.
Reaksyon daytoy ni Pascua kalpasan nga adda ti inlungalong da Senador Risa Hontiveros ken Senador JV Ejercito a gakat para iti pannakaprotehir dagiti marine ecosystem ditoy pagilyan kangrunaan na iti pannakatagiben ti tallo a marine species a pating, stingray ken chimaeras nga agtultuloy a bumabbaba ti bilang na iti Pilipinas.
Segun ken ni Pascua, iti uneg ti 10 a tawen ket dakkelen ti bimmabaan ti bilang dagiti nasao a marine species gapu met laeng ti aramid dagiti tattao.
Inlawlawag na a dagiti nasao a tallo a marine species ket maibilang nga apex predator no sadinno a no mapukaw ti maysa ket arigna mapilay ti sibubukel nga species.
Innayon na a masapol a balance ti pannakapaado dagiti nasao nga species tapno saan a maapektaran ti pagbiagan da ken pagbiagan dagiti tattao.
Mainaig iti daytoy, inpasingked ni Pascua nga agtultuloy ti panagsukisok ti nasao nga unibersidad tapno maprebentaran ti pannakadadael ti aglawlaw ken pannakapukaw dagiti species.
