LAOAG CITY – Inbatad ni Makabayan Partylist Rep. Atty. Neri Colmenares nga uray siasinno kada Speaker Alan Peter Cayetano ken ni Marinduque Rep. Lord Allan Velasco ti agtugaw nga speaker iti kamara de representantes, basta ti napateg ket matratar ti nailungalong a 2021 national budget.
Inbaga ni Colmenares nga ado pay dagiti nasken a matratar iti pondo para iti sumaruno a tawen isut gapuna a masapol a mapagsaritaan dagiti pagkasapulan ti umili.
Kuna na a masapol a maituloyen ti maikadwa a pannakadengngeg ti pondo gapu ta naisardeng itay napan a lawas.
Inpetteng na a karaman kadagiti rumbeng a masolbar ken maplansta a naimbag ket ti pondo para iti salun-at no sadinno a kayat da a manayunan; kasta met ti ayuda iti Department of Social Welfare and Development (DSWD), edukasyon ken dadduma pay.
Rumrumuar a nakissayan ti pondo kadagiti nadakamat nga opisina gapu ta maipagarop nga adda manen ti pork barrel.
