LAOAG CITY – Maisayangkat ti “awarding” ti “Search for model family” ita a tawen 2024 inton Oktubre 4.
Segun ken ni Mrs. Janet London, mangidadaulo ti Population Gender and Development ti Provincial Government of Ilocos Norte nga immun-una a naituding ti Setiembre 26 a pannakapadayaw dagiti mapili a modelo a pamilia ita a tawen.
Nupay kasta, inbatadna a naitantan iti sumagmamano nga aldaw gapu iti pannakaisagsagana ti Ilocos Norte Centennial Arena a pakaisayangkatan ti State of the Province wenno SOPA ni Gob. Matthew Marcos Manotoc.
Inlawlawagna a kadagupan dagiti 23 a Local Government Units wenno LGU’s ditoy probinsia ket 18 nga LGU dagiti adda entry-da.
Kunana a 12 dagiti entries para iti Overseas Filipino Workers category, 9 iti Professional Category ken 14 iti Non-Professional Category.
Kabayatanna, inpakaammo ni London a dagiti nangabak iti Professional Category, umuna a puestoda Mr. & Mrs. Cesario Pacis ti ili a Bacarra, maikadua a puestoda Mr. & Mrs. Felizardo Martinez Jr. ti siudad ti Batac ken maikatlo a puestoda Mr. & Mrs. Alejo Rosino, dagiti napili a model family iti Non Professional category-umuna a puestoda Mr. & Mrs. Bonifacio Mangoma ti ili a Marcos, maikadua a puestoda Mr. & Mrs. Edgar Bagasol Sr. ti ili a Paoay ken maikatlo a puestoda Mr. & Mrs. Oscar Barruga ti ili a Sarrat idinto nga iti OFW category ket umuna a puestoda Mr. & Mrs. Ernesto Tayamen ti siudad ti Laoag, maikadua a puestoda Mr. & Mrs. Dominador Pante Jr. ti ili a Burgos ken maikatlo a puestoda Mr. & Mrs. Edwin Cumlat ti ili a Vintar.
Innayonna nga umawat ti 30 ribu a pisos dagiti nangiyalat ti umuna a gunguna, 20 ribu a pisos iti maikadua, 15 ribu a pisos iti maikatlo ken sangapulo ribu a pisos a consolation prize kadagiti amin a nakipaset a pamilia a saan a nangabak gapu ta amin dagitoy ket maibilangda metten a modelo a pamilia.
