LAOAG CITY – Paigetan ti National Police Commission (Napolcom) ti screening iti panag-recruit kadagiti pulis kalpasan a nadiskubre a kaadoan kadagiti karaman iti administrative complaints ket dagiti kaserrek a pulis.
Segun ken ni National Police Commission Vice Chairman Rafael Calinisan, naobserbaran a mayorya ti nasurok a 4,000 a backlog cases nga iggem ti ahensiya ket karaman dagiti baro a police officer.
Nakapokus met dagiti isaysayangkat a reporma iti dua nga aspeto karaman ti pannakapapigsa ti legal education iti criminology schools ket pagbalinen a naig-iget pay ti neuro-psychiatric examination.
Inadmitir ti National Police Commission official nga ado dagiti police officers ti awan ti mastery of law a napateg iti trabaho da.
Innayon na a kaadoan kadagiti police officers ket criminologists, ngem saan da nga ammo dagiti exception iti warrantless arrests, a napeggad isut gapuna a rumbeng a maamoan da ti linteg.
Iti agdama, inyalud-od ti National Police Commission ti katulagan na iti Integrated Bar of the Philippines tapno makaipaay ti in-person workshops ken legal aid kadagiti aktibo a police members a gagem na a malapdan ti minor procedural lapses iti police operations a masansan nga agtungpal ti pannakaibasura ti kaso.
