LAOAG CITY – Inpabasol ni Public Works Secretary Manuel Bonoan ti narabaw ken dagiti barado a karayan, kasta pay ti pannakakissay ti pondo dagiti flood control projects, iti nalawa a layos iti pagilian kalpasan ti sumagmamano nga aldaw a panagtudtudo na.
Segun ken ni Bonoan, iti panagtugaw na idi Hulyo 2022, nabayagen a problema ti panaglayos gapu kadagiti narabaw a karayan.
Inkarina a tutukan ti Department of Public Works and Highways ti desilting wenno pannakadalos kadagiti kangrunaan a karayan tapno mapasayaat ti panagayos ti danom.
Immunan a binabalaw ti publiko ti goboerno gapu kadagiti flood control projects a saan a nakatulong iti baet dagiti napipigsa a tudo iti baet ti binilyon a pisos nga inlatang ti gobierno.
Maipalagip nga iti maikapat nga State of the Nation Address (SONA) ni Presidente Ferdinand Marcos Jr. , binallaagan na dagiti kunniber nga opisyal ken kontratista a nagaramid iti palpak ken am-amangaw a flood control projects ken nagpangta nga agsungbat dagiti nagkurakot iti likudan ti “ghost projects”.
Inkari pay ti presidente a maaddaan ti audit ken agpila ti kaso kontra kadagiti karaman kadagiti nadakamat a “ghost projects” a marugyan intono Agosto ita a tawen.
Iti agdama, addan ti 9,856 a flood control projects a nalpas idinto a 5,700 ti manarimaan a maar-aramid.
Nupay kasta, inadmitir ti Department of Public Works and Highways nga awan pay ti maymaysa a national master plan tapno malabanan ti layos iti pagilian.
Kabayatanna, inbatad ni Senate President Chiz Escudero nga agpila ti gakat para iti pannakaipawil dagiti opisyal ti gobierno ken dagiti kabagyan da agingga iti 4th degree nga agbalin a supplier ti gobierno tapno maliklikan ti conflict of interest.
