LAOAG CITY – Makapungtot ni Barangay Kagawad Levie Aloag Gerardo, ti Brgy. 8 ditoy siudad ti Laoag kalpasan nga adda ti maysa a tricycle a maipagarup a naregreg ti basura a kargana a naglaon kadagiti nagawangan ti medical equipment ti ospital kas ti syringe, suero, injection ken dadduma pay iti sangoanan ti maysa a pagtaengan.
Segun kenkuana, apaman a nakitana ti nasao a basura ket dagusna nga in-report daytoy iti Kapitan ken inrebyuda ti ala ti Close Circuit Television wenno CCTV Camera.
Inbatadna a ti triycle body number ket 024 a taga iti ili ti Vintar no sadinno nga indanonda metten daytoy iti kuerpo ti pulisia tapno ipa-trace ti akinkukua ti nasao a lugan.
Inlawlawagna a basar iti obserbasionda ket inranta ti maseknan a tricycle driver ti nangiregreg ti basura iti barangayda.
Mainaig iti daytoy, kuna ni Kagawad Gerardo a basar iti pannakisarsaritana iti maseknan a driver ket saanna a nadlaw a natnag ti basura iti tricycle-na.
Nupay kasta, inpalgakna a tinawaganna ti Community Environment and Natural Resources Office wenno CENRO tapno maammoan no ania ti mabalin a maipataw a pannusa kontra iti daytoy.
Innayonna a daytoy ti umuna a daras a napasamak ti insidente iti barangayda ngem desidido ti Kapitanda a mangipila ti reklamo kontra iti nangibelleng ti basura nangruna ket mabalin a mangitunda ti risgo iti salun-at ti linaon ti basura.
