LAOAG CITY – Maikkat ti naruay a bakante a posision ti Provincial Government of Ilocos Norte.
Pakairamanan ditoy ti 7 a permanente a plantilla position, 4 nga Administrative Aide III, 81 nga Administrative Aide I wenno casual position a Salary Grade 1.
Daytoy ket kalpasan a nakita ti Provincial Human Resource and Development Office a dagitoy ket nabayagen a bakante.
Naammoan a babaen ti maysa nga ordinansa a mangipalubos ti pannakaikkat dagitoy a posision ket maurnos dagitoy, maipangato ti sueldo ken maiyalokaran ti naan-anay a pundo.
Kabayatanna, kwinestionaran ni Sangguniang Panlalawigan Member Aladine Santos ti saan nga agpada ti adda iti Draft Resolution ken ti surat manipud iti Provincial Legal Office nga 86 ti bakante nga Administrative Aide I.
Gapu iti daytoy, inlawlawag ti Provincial Human Resource and Development Office a dati nga 86 ti bakante nga Administrative Aide I ngem adda ti na-hire sakbay pay ti pannakai-draft ti nasao nga ordinansa.
Mainaig iti daytoy, naipasa ti nasao a gakat iti maikatlo a pannakaibasana kalpasan nga immanamong ti 13 a miembro ti Sangguniang Panlalawigan.
