LAOAG CITY – Naruay a bala ken magazine ti paltog ti nadiskobre dagiti sumagmamano a residente iti waig a sakopen ti Sitio Maritem-A iti Brgy. Pila ditoy siudad ti Laoag.
Segun ken ni Brgy. Chairwoman Erlinda Foster iti nasao a barangay, naklaat kalpasan a naireport kenkuana ti pannakadiskobre dagiti bala ken magazine.
Inbatad na nga iti palawag dagiti kabarangayanna ket mapanda koma agsigay iti waig ngem imbes a lames ti maala dagitoy ket naruay a bala ken magazine.
Gapu iti daytoy, inbatad na a masukimat a naimbag ti waig tapno maduktalan nu adda pay dagiti magazine wenno bala.
Naamoan a nasurok 35 a magazine ken bulto a bala ti nadiskobre dagiti nagsigay pakairamanan ti maysa a flashflight ken cellphone ken naipalaon dagitoy iti plastic bag.
Kabayatanna, agpapan a maisursurat ti damag ket posible nga adda ti mainayun iti bilang dagitoy.
