LAOAG CITY – Naruay a job seekers ditoy probinsia ti nakipaset iti Job Fair kagiddan iti maika-123 a Labor Day ti pagilian ita nga aldaw, Mayo 1.
Segun ken ni Kathleen Coloma a residente ti Barangay Bengcag ditoy siudad ti Laoag ken maysa kadagiti na-hired on the spot, napalaos ti ragsakna gapu ta arig agmakatawenen nga awan ti trabahona.
Inbatadna a nabayagen nga agbirbiruk ti trabaho ngem awan ti tumawtawag kenkuana manipud kadagiti opisina wenno kompania a nagaplikaranna.
Naammoan a dagiti aplikante a na-hired on the spot ket naikkan ti t-shirt manipud iti Department of Labor and Employment wenno DOLE idinto a dagiti aplikante a na-hired on the spot a maibilang a low-income wenno aggapu iti indigent family ket maipaayan ti lima a ribu a pisos babaen ti panangtingiting ti Department of Social Welfare and Development wenno DSWD.
Kabayatanna, naammoan nga adda ti 43 nga employers manipud kadagiti nagduduma a kompania ken 13 a government agencies ti nakipartisipar iti naindaklan nga aktibidad para kadagiti mangmangged.
