LAOAG CITY – Nakaawat ti nabara a kablaaw ni United States President Donald Trump kalpasan ti panagsapatana kas maika-47 a Presidente ti Estados Unidos.
Indauloan ni King Charles III nga indanonna ti kablaawna kalpasan a nagsapata ni Trump.
Mangnamnama daytoy nga ad-adda pay a mapaigetan ti relasion ti dua a pagilian maipapan iti ekonomia.
Inrakurak met ni Palestinian Authority President Mahmoud Abbas a nakasagana isuna a makatrabaho ni Trump tapno mmagun-od ti pudno a kinakappia.
Personal a nagatendar ni Italian Prime Minister Giorgia Meloni ken kinablaawanna ni Trump no sadinno a nakasagana daytoy a tumulong tapno maipasa ti panagsinnarita ti Estados Unidos ken Europa.
Plano met ni Israeli Prime Minister Benjamin Netanyahu a personal a bisitaen ni Trump.
Inbatadna a ti kangrunaan a mabalin a talantanenda ket ti ceasefire deal iti Hamas.
Mamati ni North Atlantic Treaty Organization (NATO) Secretary General Mark Rutte a pumigsa ti defense spending ken production gapu iti panagtugawen ni Trump.
Inawagan met ni Ukrainian President Volodymyr Zelensky a ti panagsapata ni Trump ket kas aldaw ti panagbalbaliw ken namnama.
Agtalek isuna a masolbar ti aniaman a problema ken karit iti lubong gapu iti panagtugaw ni Trump.
