LAOAG CITY – Naruay a mannalon iti siudad ti Batac ti nagkamang iti Sangguniang Panlungsod tapno maipadanon ti arungaing da seknan iti saan pay a panangited ti Northern Food Corporation (NFC) ti bayad ti kamatis.
Segun ken ni Sanngunian Panlungsod Member Luck Bunye, addan maysa agingga iti dua a tawen ti napalabas sipud inutang ti korporasyon ti produkto dagiti mannalon ken kaaduan ket residente iti Brgy. Tabug iti nasao a siudad.
Kuna na a basar iti maysa kadagiti nakasarsarita na a mannalon, umabo iti 600,000 a pisos ti balor ti kamatis a nailako na iti NFC ngem agpapan ita ket awan pay ti naited a bayad.
Gapu iti daytoy, inbatad ni Bunye a posible nga umabot iti minilyon a pisos ti utang ti NFC kadagiti mannalon.
Mainaig iti daytoy, nangipatulod ti SP ti surat iti NFC seknan iti nasao a banag ken maiyur-uray ti sungbat daytoy.
Maipalagip a nagrikep ti NFC idi Disyembre 2021 babaen ii mandato ti Malakanyang gapu iti pannakapaay ti korporasyon a makaaramid ti napintas nga output.
Kabayatanna, adda ti nabukel a Technical Working Group nu sadino a bukbuklen ti tapno dagitoy ti agsungbat ken mangurnos amin a bayadan ti korporasyon.
