LAOAG CITY – Mabutbuteng dagiti naruay a nagannak dagiti ubbing a na-kidnap idiay Nigeria nga agsarita mainaig iti pannaka-kidnap dagiti annak dagitoy.
Daytoy ket kalpasan nga awan ti tured dagitoy nga agsarita kadagiti otoridad ken dagiti agirakrakurak.
Dumanon iti sumurok 300 nga estudiante ti na-kidnap babaen kadagiti armado a lallaki iti St. Mary’s Catholic School iti Papiri village iti central state ti Niger iti nasapa nga oras idi aldaw ti Nobiembre 21.
Basar kadagti otoridad, agtawen ti lima nga ubing ti kaubingan a na-kidnap no sadinno adda pay ti agarup 250 ti nagtalinaed a mapukpukaw.
Daytoy nga insidente ket paset ti kumarkaro a mapaspasamak a panag-kidnap iti north ken central Nigeria.
Maitudtudo nga akin-aramid iti daytoy ket dagiti criminal gangs nga ad-adda nga am-ammo iti awag a “bandits” a mapapati a mangiwaywayat ti kidnapping for ransom kas alisto a wagas tapno makabirukda ti kuarta.
