LAOAG CITY – Manamnama a marugian a maipasdek iti siudad ti Batac ti “Trading Post” wenno “Bagsakan” iti daytoy a bulan ti Enero wenno Pebrero.
Segun ken ni Mayor Albert Chua, daytoy ket manipud iti gobierno probinsial.
Immun-una ngem iti daytoy, impeksana ti napala-os a yaman ken ragsakna iti panangpili ti Provicial Government of Ilocos Norte iti siudad ti Batac a pakaipasdekan ti nasao a proyekto.
Imbatadna a maipasdek ti nasao a proyekto iti kalawa a sangapulo nga ektaria a lote ti gobierno ti siudad ti Batac iti likud ti tiendaan.
Inlawlawagna nga indiayana pay iti gobierno probinsial ti pannakaipasdek ti central terminal wenno transportation hub iti siudad ti Batac agsipud ta adda ti lote ti siudad a mabalin a mausar a pakaipasdekan ti nasao a proyekto.
Malaksid iti daytoy, inpakaammo ni Chua a manamnama a marugianen ita a bulan ti Enero ti “Training Center” iti siudad ti Batac iti sakop ti Barangay Naguirangan.
Kunana nga umab-abot iti tallo gasut a milyon a pisos ti nailatang a pondo para iti nasao a proyekto.
Impalgakna a daytoy a proyekto ti main-inut a mapagbalin nga sports complex iti siudad ti Batac.
Segun kenkuana, maiyunay-unay a maipasdek ti “covered building” a mabalin a pagay-ayaman ti basketball, volleyball ken dadduma pay nga “indoor sports” ken kalpasanna in-inut a maikkan ti pasilidad kas iti “track and field”, “swimming pool” ken dadduma pay.
Mainaig iti daytoy, mangnamnama pay ni Chua nga ita a tawen 2024 ket mapatgan dagiti nabayagen a kiniddaw na iti department of Public Works and Highways, National Irrigation administration ken Department of Agrarian Reform agsipud ta dagitoy ket inyendorsaren ti Regional Development Council iti National Economic and Development Authority.
Kagiddan daytoy, impadanon ti Mayor ti panangnamnamana a mapagbalin ti siudad ti Batac a maysa kadagiti umuna nga Smart City ditoy Rehion Uno.
